काठमाडौँ । काठमाडौँस्थित त्रिभुवन अन्तर्राष्ट्रिय विमानस्थलमा म्याद सकिएका प्रवेश पासहरू प्रयोग भइरहेका पाइएको छ, जसले विमानस्थल सुरक्षामाथि गम्भीर प्रश्न उठाएको छ।
विमानस्थल स्रोतका अनुसार डिसेम्बर २०२५ सम्म मात्र मान्य रहेका पासहरू अद्यावधिक नगरी अझै प्रयोगमा रहेको देखिएको हो। संवेदनशील क्षेत्रहरूमा आवतजावतका लागि प्रयोग हुने यस्ता पासहरू म्याद नवीकरण नगरी चलाइनु प्रशासनिक कमजोरीको संकेत मानिएको छ। सुरक्षा विज्ञहरूका अनुसार मिति गुज्रेका पासहरूको दुरुपयोगले अवाञ्छित व्यक्तिहरूलाई विमानस्थलको आन्तरिक क्षेत्रमा प्रवेश गर्न सहज बनाउने जोखिम बढाउँछ। यसले विमानस्थल मात्र नभई समग्र राष्ट्रिय सुरक्षामा समेत असर पार्न सक्ने चेतावनी दिइएको छ।
यसैबीच, विमानस्थल प्रमुख टेकनाथ सिटौलाको नियुक्तिपछि व्यवस्थापनमा अव्यवस्था बढेको आरोपसमेत उठ्न थालेको छ। केही अधिकारीहरू निर्णय प्रक्रिया पारदर्शी नभएको र सीमित समूहको प्रभाव बढेको बताउँछन्। विमानस्थलभित्रका सेवा तथा ठेक्का प्रक्रियामा पनि निश्चित समूहको पहुँच मात्र रहेको गुनासो बढ्दै गएको छ। कर्मचारीहरूका अनुसार यस्तो वातावरणले प्रतिस्पर्धा कमजोर बनाउनुका साथै नियम कार्यान्वयनमा समेत असर पारेको छ।
सरकारले विमानस्थललाई अन्तर्राष्ट्रिय मापदण्डअनुसार सुरक्षित र व्यवस्थित बनाउने प्रतिबद्धता दोहोर्याउँदै आएको भए पनि यस्ता घटनाले कार्यान्वयन पक्ष कमजोर रहेको देखिएको छ। सम्बन्धित निकायले तत्काल छानबिन गरी दोषीमाथि कारबाही गर्नुपर्ने माग उठेको छ। विमानस्थलकै एक अधिकारीले म्याद सकिएका प्रवेश पासहरूको प्रयोग जस्तो संवेदनशील विषयमा ढिलाइ नगरी सुधारात्मक कदम चाल्नुपर्ने बताएका छन्।
